မြန်မာနိုင်ငံဟာ ဒီမိုကရေစီဝါဒကိုကျင့်သုံးပြီး ငြိမ်းချမ်းတဲ့နိုင်ငံတစ်ခုဖြစ်ဖို့ နိုင်ငံရေးနဲ့ စီးပွားရေးမှာ အရေးကြီးတဲ့ပြောင်းလဲမှုတွေ လုပ်နေပါတယ်။ မြန်မာနိုင်ငံအတွင်း ဆင်းရဲမှု ပပျောက်စေဖို့ နိုင်ငံတကာမှာကျင့်သုံးနေကြတဲ့ အကောင်းဆုံး နည်းလမ်းတွေကို အခြေခံပြီး၊ နိုင်ငံတဝမ်း ရေရှည်တည်တံ့မယ့် စီးပွားရေးကို ဖော်ဆောင်နိုင်ဖို့ ပြီးပြည့်စုံတဲ့ နိုင်ငံဖွံ့ဖြိုးရေးစီမံကိန်းတစ်ခု (National Comprehensive Development Plan) ကို ရေးဆွဲထားပါတယ်။ တိုးတက်မှု နှောင့်နှေးတဲ့ နိုင်ငံတစ်ခုအနေနဲ့ နိုင်ငံတကာဈေးကွက်ကို ဝင်ရောက်တဲ့အခါ အကူအညီဖြစ်စေဖို့၊ မြန်မာနိုင်ငံအတွက် အခွန်စည်းကြပ်မှုမှာ ဦးစားပေးမှုတွေ ရှိပါတယ်။

မြန်မာနိုင်ငံအစိုးရက လူ့အဖွဲ့အစည်းနဲ့ သဘာဝပတ်ဝန်းကျင်ကို ကောင်းကျိုးပြုနိုင်မယ့် ရင်းနှီးမြှုပ်နှံမှုတွေကို အားပေးဖို့ ထက်သန်စွာ နှစ်မြှုပ်လုပ်ဆောင်ပါတယ်။ ဒါကြောင့် တချို့ကဏ္ဍတွေမှာ ရင်းနှီးမြှုပ်နှံတာကို တားမြစ်ကန့်သတ်ထားတာတွေ၊ သို့မဟုတ် သတ်သတ်မှတ်မှတ် ထောက်ခံချက်တွေ၊ လုပ်ငန်းစဉ်တွေ၊ အကျိုးတူပူးပေါင်းလုပ်ဆောင်မှုတွေ လိုအပ်နိုင်ပါတယ်။ ဒါ့အပြင် ဒေသခံပြည်သူတွေနဲ့ သူတို့ရဲ့ ဘဝတွေ၊ သဘာဝပတ်ဝန်းကျင်တွေအပြင်၊ ငြိမ်းချမ်းရေးနဲ့ အမျိုးသားရင်ကြားစေ့ရေး အပေါ်ဆိုးကျိုးသက်ရောက်မှု မရှိစေရန် သဘာဝပတ်ဝန်းကျင်နဲ့လူထုအပေါ် သက်ရောက်မှုရှိနိုင်မယ့် ဆိုးကျိုးတွေကို သုံးသပ်စစ်ဆေးမှုတွေလုပ်ဖို့ လိုအပ်နိုင်မှာ ဖြစ်ပါတယ်။